Haunani Kay Trask

He leo aloha no ke aloha ‘āina nona ka inoa hanohano ‘o Haunani Kay Trask

Auē ke aloha nui e ke kia’i wiwo‘ole o ka lāhui Hawai‘i
Ka wahine kūpa‘a no ka pono o ka ‘āina mai ka mauna a hiki loa i ke kai
Ka wahine koa o ke aukahi ho’iho’i ea
Ka wahine āiwaiwa o ka Moananuiākea
Ka wahine hiapa‘i‘ole o nā hehi ‘ale
Auē ka maka‘ūpē
Auē ke kani‘uhū
Auē ka mānewanewa
Auē ka mokumokuāhua
Auē ke aloha piha iā ‘oe e Haunaniokawēkiuohaleakalā
Ala mai ka wahine o ka pō nāna i ka‘akua kūkulu o Kahiki
Ho‘omoea mai ke alaua
‘O ke ala ka e hele ai
‘O ka pūnohu
‘O ka ua koko
E ho‘i i ke au o nā kūpuna
I ka ‘āina o Kuaihelani
I Nu‘umealani
I Ke‘alohilani
I Hōlanikū
I Hōlanimoe
E moe
E moe
Ke auī nei ka lā
Welo
Welo

E mau ana nō kou inoa
E mau ana nō kou aloha
E mau ana nō kou ho‘oilina

E aloha ē
E aloha ē
E aloha nō ē

E ola nō kou inoa a kau i ka wēkiu

PC: @adamkeawe